PROBATSIYA XIZMATI XODIMINING MUROJAATLAR BILAN ISHLASH FAOLIYATI

Annotatsiya

Mazkur maqolada probatsiya xizmati xodimining murojaatlar bilan ishlashdagi faoliyati, uning huquqiy, tashkiliy va amaliy jihatlari keng yoritilgan. O‘zbekiston Respublikasida inson huquqlarini ta’minlash, jinoyat sodir etgan shaxslarni qayta ijtimoiylashtirish, ularning jamiyatga muvaffaqiyatli qaytishini ta’minlashda probatsiya tizimi muhim o‘rin tutadi. Shu jarayonda probatsiya xodimining murojaatlar bilan ishlash faoliyati alohida ahamiyat kasb etadi, chunki bu jarayon inson huquqlarini himoya qilish, ijtimoiy adolatni ta’minlash hamda fuqarolarning davlat organlariga bo‘lgan ishonchini mustahkamlashga xizmat qiladi. Maqolada murojaatlar bilan ishlash jarayoni — fuqarolarning ariza, shikoyat va takliflarini qabul qilish, ularni o‘rganish, qonuniy va asosli javoblar tayyorlash, shuningdek, ularning muammolarini hal etish mexanizmlari asosida tahlil qilingan. Probatsiya xodimlari faoliyatining bu yo‘nalishi insonparvarlik, shaffoflik, qonun ustuvorligi tamoyillariga asoslanadi. Ayniqsa, jazoni ijro etish jarayonidan keyingi bosqichda, shaxsning ijtimoiy hayotga qaytishi davrida murojaatlar tizimi ularning ehtiyoj va muammolarini aniqlashda, ijtimoiy yordam chora-tadbirlarini belgilashda muhim vosita sifatida namoyon bo‘ladi. Maqolada murojaatlar bilan ishlashda uchraydigan muammolar, xodimlarning kommunikativ malakasi, huquqiy savodxonligi va axborot texnologiyalaridan foydalanish ko‘nikmalari bilan bog‘liq masalalar ham tahlil qilinadi. Probatsiya xodimining professional etikasi, inson huquqlarini hurmat qilish tamoyillari, shuningdek, murojaatlar bilan ishlashda psixologik yondashuvning ahamiyati yoritilgan. Tadqiqotda murojaatlar bilan ishlash faoliyatini takomillashtirish bo‘yicha takliflar ishlab chiqilgan. Jumladan, elektron murojaatlar tizimini kengaytirish, murojaatlarni monitoring qilish mexanizmini kuchaytirish, shikoyatlarni hal etishda ijtimoiy sheriklik asosida ishlash, shuningdek, probatsiya xodimlari uchun maxsus o‘quv dasturlarini joriy etish zarurligi asoslab berilgan.