KORRUPSIYAGA QARSHI KURASHDA HUQUQIY ISLOHOTLARNING AHAMIYATI

Annotatsiya

Ushbu maqolada zamonaviy davlat boshqaruvi tizimida korrupsiyaga qarshi kurashishning konseptual huquqiy asoslari va ularning amaliy ahamiyati tizimli ravishda tahlil qilinadi. Tadqiqotning dolzarbligi korrupsiyaning davlat iqtisodiy xavfsizligiga va qonun ustuvorligi tamoyiliga salbiy ta’siri bilan asoslanadi.Maqola doirasida O‘zbekiston Respublikasining so‘nggi yillardagi antikorrupsion qonunchiligi, xususan, "Manfaatlar to‘qnashuvi to‘g‘risida"gi hamda "Davlat xaridlari to‘g‘risida"gi qonunlarining huquqiy mexanizmlari qiyosiy o‘rganilgan. Muallif korrupsiyaga qarshi kurashishda faqat jazo choralarini qo‘llash emas, balki normativ-huquqiy hujjatlarning antikorrupsion ekspertizasi va "komplayens-nazorat"  tizimini joriy etish orqali preventiv (oldini oluvchi) huquqiy muhit yaratish masalasiga alohida e’tibor qaratadi. Tadqiqot jarayonida BMTning Korrupsiyaga qarshi konvensiyasi normalarining milliy qonunchilikka implementatsiya qilinishi va xalqaro standartlarning  o‘rni tahlil qilingan. Maqola yakunida korrupsiyani keltirib chiqaruvchi huquqiy bo‘shliqlarni  bartaraf etish, davlat xizmatchilarining daromadlarini deklaratsiyalash tizimini takomillashtirish va sud hokimiyatining real mustaqilligini ta’minlash bo‘yicha ilmiy asoslangan taklif va tavsiyalar ilgari surilgan.