PROFILAKTIKA INSPEKTORINING VOYAGA YETMAGANLAR ORTASIDA HUQUQBUZARLIKLARNING YAKKA TARTIBDAGI PROFILAKTIKASINI TAKOMILLASHTIRISH

Abstract

Mazkur maqolada profilaktika inspektorining voyaga yetmaganlar orasida huquqbuzarliklarning oldini olishdagi yakka tartibdagi faoliyatini takomillashtirish masalalari tahlil qilinadi. Jamiyatda voyaga yetmaganlar orasida sodir etilayotgan huquqbuzarliklar sonining ortib borishi, ularning ijtimoiy muhitga moslashuv darajasining pastligi, oila va ta’lim muassasalaridagi nazoratning yetarli emasligi kabi omillar ushbu muammoni chuqur o‘rganish zarurligini ko‘rsatadi. Shuning uchun ham profilaktika inspektorlari faoliyati, ularning huquqiy bilimlari, psixologik yondashuv uslublari va voyaga yetmaganlar bilan individual ishlash tajribasi jamiyat barqarorligini ta’minlashda muhim o‘rin tutadi. Maqolada huquqbuzarliklarning shakl va sabablari, ularning ijtimoiy-psixologik ildizlari, shuningdek, profilaktika inspektorlarining bu boradagi amaliy faoliyatini yanada samarali tashkil etish yo‘llari ko‘rib chiqiladi. Yakka tartibdagi profilaktika — bu har bir voyaga yetmagan shaxs bilan individual ishlash, ularning oilaviy ahvolini, o‘quv jarayonidagi holatini, do‘stlik muhitini, ijtimoiy munosabatlarini o‘rganish va shu asosda maqsadli profilaktika choralarini belgilash jarayonidir. Tadqiqotda profilaktika inspektorlarining kasbiy malakasini oshirish, zamonaviy axborot texnologiyalaridan foydalanish, maktab, mahalla, tibbiyot va ijtimoiy xizmatlar bilan hamkorlikni mustahkamlash zarurligi ta’kidlanadi. Ayniqsa, voyaga yetmaganlarning huquqbuzarlikka moyilligini erta aniqlash, ularni psixologik qo‘llab-quvvatlash, bandligini ta’minlash hamda ijobiy ijtimoiy muhit yaratish masalalari dolzarbdir.